SPIZ Asociazion de Promozion Sociale xè lieta de comunicar che sabo 20 e domenica 21 setembre 2014 torna la tanto atesa Rampigada Santa.

La manifestazion, che come consuetudine vegnerà co-organizzata con el Comun de Trieste e la colaborazion de l'Asociazion Sportiva Diletantistica Mappets, se colocherà dentro la Setimana Europea per la Mobilità Sostenibile (European Mobility Week).

SPIZ xè un'Asociazion de Promozion Sociale nata nel 2009 dopo de la prima edizion del divertente garin de tufi triestini ciamado Olimpiade dele Clanfe, e se contradistingui per la volontà de stuzigar la zità de Trieste e la sua società organizando eventi che posi ridarghe alegria, forza, senso critico, e, sopratutto, paxe e serenità.

La Rampigada Santa xè nata nel 2012 dopo un longo e tortuoso percorso organizativo da l'idea del presidente de SPIZ Mauro Vascotto e dei soci de l'asociazion che i lavora totalmente su base volontaria, e vol eser un evento che atraverso el sport promuovi l'impegno sociale ed educhi a una mobilità e a stili de vita più sostenibili.

Rivada ala terza edizion, la Rampigada Santa 2014, prevederà do giornade de eventi, incontri, gare, stand e chioschi eno-gastronomici.

Sabo 20 setembre 2014 nel piazal de l'Obelisco, vegnerà alestido el Rampigada Santa Village, un spazio dedicà a la promozion ed educazion ala mobilità e ai stili de vita sostenibili, dove sarà posibile visitar i stand dei partners de la Rampigada Santa, partecipar a gare, test e altre atività, e goderse el panorama oferto dal piazale de l'Obelisco degustando prodotti eno-gastronomici a "chilometri zero". Da le 5 de dopopranzo riunion musicale estemporanea verta a tute e tuti che su griglie de acordi e temi conossudi improviserà senza niente de preordinado con el solo scopo de star sereni. Tuti xè invitadi a portar i sui strumenti musicali e i sui amici. L'improvisada jam sesion domaćia vegnerà indirizada sula giusta via dala verve dei Sardoni Barcolani Vivi.

Domenica 21 setembre 2014 continuerà le manifestazioni colaterali al Rampigada Santa Village, ale 9 e meza vegnerà serada al trafico veicolare Scala Santa permetendo cusì a tuti i apasiondi e curiosi de rampigarse su per la via e scoprir che "se pol" 'ndar a pie dal centro zità fin sul'altipian, e ale ore 10:00:00 in punto vegnerà dà el via ala 3ª Rampigada Santa 2014, la crono-scalada de corsa o in bici de la storica riva triestina de Scala Santa, poco più de 2.000 metri de lungheza tuti pavimentai con bolognini a fine 1800 (i cubi de porfido xè in gran parte ancora quei originai) con pendenza media del 16,2% (10,8% minima - 20% masima).

Visto el suceson de ascolti del'edizion 2013 vegnerà trasmesa la direta streaming de tuto l'evento (che podè veder a 'sto link), grazie ala tecnologia e ala profesionalità de Fluido TV .

La 3ª Rampigada Santa 2014 xè valida per el concorso dela Combinada SPIZ una sorta de IronMan in salsa triestina che premierà la meo atleta dona e el meo atleta omo che gaverà partecipà a entrambe le manifestazioni organizade nel 2014 da l'Asociazion e che xè la 7ª Olimpiade dele Clanfe 2014 de sabo 26 luglio 2014 e, apunto, la 3ª Rampigada Santa de domenica 21 setembre 2014.

Per iscrizioni e informazioni: www.spiz.it