El 26 luglio 2014, all'Ausonia de Trieste, torna per la setima volta la tanto atesa Olimpiade dele Clanfe, la competizion de tufi, tipicamente triestini, nati col witz di far el schizo più alto posibile. Se trata de l'evento estivo ormai più famoso a Trieste, dove tuti i meo “clanfadori”, ma anche i pezo, se raduna per dar sfogio del proprio manigo, o se non altro del “morbìn”, la voja de divertirse e star insieme.

Una perfeta clanfa se fa butandose verso l'acqua come se se volesi ciapar una sazia panzada. Prima del contato con l'acqua, xè importante serarse asumendo una posizion “ovoidale”, per citar el zogador de palcanestro profesionista Andrea Pecile, uno dei masimi ambasadori dela clanfa nel mondo. Serai in sta maniera, la panzada te la eviti. Per far el schizo, servi un altro gesto tecnico: una volta in acqua, bisogna riverserse e petar un bel colpo de reni (definido sempre dal Pecile “movimento zifonela dele culate”) in modo da produr una forza d’urto che butarà l’acqua per aria. Questa xè la clanfa triestina.

L’Olimpiade delle Clanfe na'si ne l’estate del 2008, grazie a un’intuizion de Mauro Vascotto. Nela prima edizione se gà confrontà 60 de lori, divisi per categorie in base a l’età (fioi e pice, muleti e mulete, muli e mule, muloni e babe, e vece bobe e vece marantighe), e la risposta del publico e dei media xè stada notevole. Poco dopo se gà costituì l’Associazion de Promozion Sociale SPIZ (www.spiz.it), che da quel momento gà curà ogni ano l’organizzazion de l’evento.

Adeso, nel 2014, semo rivaj ala Setima Edizion, in programa sabato 26 de luglio sempre all’Ausonia, dale 2 de dopopranzo in poi. I numeri dela manifestazion xe cresudi de ano in ano e tuto fa imaginar che i iscriti riverà presto a quota 200. Dozento tufi, un per omo, come recita el regolamento.

El stile va dichiarado al momento de l’iscrizion, perché ognidun gà el proprio coeficiente de dificoltà e conseguente bonus per el puntegio. Se pol partecipar fazendo una clanfa, una bomba o un testabalòn (kamikaze), altri do tufi molto ben conosudi nel litoral giuliano. Ognidun dele tre tecniche gà poi tante varianti, se va da semplici “caminade” in volo, ai salti mortali, ai avitamenti, ai movimenti de bacino anche prima de entrar in acqua nela cosideta “taconeti”, ala “biancabalena” fata tirandose zò le mudande de bagno, al “mortaio”, che consisti nel doprar el schizzo per sparar in cielo un balon. Notevole el lavoro dela Giuria nel valutar tute ste componenti in un puntegio solo. Zinque giurati vota prima el stile de l’esecuzion del tufo, del quale xè stà calcolà el coeficiente de dificoltà, dopo se vota l’entità del schizo, e in fine un sesto giurado vota “el morbìn”, la presenza scenica. O forsi sareia meo definirla “scemica”. El tuto vien somado per gaver el puntegio final.

Come l'altro ano l'Asociazion SPIZ, che in Setembre organizerà anche la Terza edizion de la Rampigada Santa, una gara in salita de corsa o in bici sula temibile Scala Santa a Trieste, riproponi la clasifica speciale per chi parteciperà a tuti e do i eventi, la Combinata SPIZ, una specie de Ironman in salsa triestina, per i atleti più temerari, o semplicemente con più voja de divertirse in alegria.

Visto el suceson de ascolti de l'edizion 2013 vegnerà trasmesa de novo la direta streaming de tuto l'evento (che podè veder a 'sto link), grazie ala tecnologia e ala profesionalità de Fluido TV .

Per adeso spetemo el 26 luglio, e nel fratempo, Tira 'na Clanfa!

Per iscrizioni e informazioni: www.spiz.it